inikkatkon ti microsoft office (word, excel, powerpoint, access, publisher), dagiti adobe kas kada macromedia products (photoshop, acrobat, pagemaker, dreamweaver, flash, fireworks) ken dadduma pay a commercial apps iti usarko a pc iti oficina.

apay?

awan lang, awan maaramidan.

ay, saan gayam. kayatko la a rugianen, kayatko a sublian gayam, kayatko a praktisen manen ti agaramat iti free wenno open source a software. ‘tay awan pakadanagam iti licensing wenno violation iti intellectual property rights ek-ek.

nagserioso ngaminen dagiti ahensia nga agtiltiliw ken agraraut kadagiti agus-usar iti pinirata a sopwer.

ilunglungalong daytoy ti bsa, business software alliance, maysa nga organisasion dagiti agar-aramid iti sopwer. iti filipinas, nangaramidda iti maysa nga anti-piracy team a buklen ti bsa, nbi, pnp ken omb, ket adda inlatangda a 30-aldaw a grace period tapno ag-comply dagiti private ken public business establishments a mangikkat kadagiti usarda a pirated a sopwer ken mangala ken mangiplastar iti lisensiado a sopwer kadagiti computers nga aramatda iti negosioda.

kalpasan dayta, inton septiembre 16, mangrugidan nga agraut ken agtiliw.

ita, agar-aramatak manen iti open office, imbes a microsoft office. gimp, imbes a photoshop. avg free, imbes a mcafee wenno norton. ken dadduma ken adu pay.

isuna laeng ta windows pay la’t os nga usar. adda ketdi linux desktopko a pagek-eksperimentuak.

ti mapaliiwko, iti filipinas, umad-adun dagiti agusar iti linux ken dadduma pay nga open source nga os ken applications. nangruna ita kadagitoy nga adda raid dagiti pannakabagi ti lenteg kontra piracy. mapilitan ti adu nga umakar iti linux gapu ta napalalo met ti nginana dagiti windows software. saan a kabaelan ti kaaduan.